政Whats噏：父子情淡　梁耀忠嘆工時長拖累

工時太長，的確會影響家庭關係。身為人父的立法會議員梁耀忠，今日於深水埗一個活動中真情剖白，話為咗應付議員職務，未能抽時間陪伴囝囝成長，導致父子關係冷淡，實屬人生憾事。

梁耀忠話自己只得一名兒子，按理獨生子應得到父母萬千寵愛，但可惜佢同太太鬧離婚。儘管梁耀忠得到撫養權，但就抽不到足夠時間陪伴囝囝成長。梁耀忠話雖然佢每逢假日例必同囝囝四出遊玩，但囝囝始終生活於一個單親家庭，每當佢需要傾訴對象，梁耀忠總不在身邊。後來囝囝13歲往外國讀書，父子接觸更少，大家的關係就更淡薄。如今囝囝24歲學成歸來，較為明瞭父親的處境，兩者隔閡亦略有改善，但係過長的工作時間，始終有礙父子感情。梁耀忠話無論是議員抑或上班族，長工時都是一道難以解決的問題。

至於今次梁耀忠出席的活動，佢係以嘉賓身份，為香港社區組織協會，推介今年9月舉辦一項關注䆁囚的展覽會。據協會幹事練安妮表示，展覽目的係呼籲大眾以寬容態度看待䆁囚，給予機會重投社會。

※更多政經猛料、秘聞，請關注政Whats噏fb：