政Whats噏:驚嚇!麥美娟懷王國興「骨肉」開會

20181025
東網電視
更多新聞短片
麥美娟今日抱住的「BB」,正是王國興的「骨肉」。
立法會今日(25日)審議將男士侍產假增至5天嘅條例草案,仍是「黃花閨女」嘅立法會議員麥美娟(Alice)就抱住個「BB」入立法會會議廳開會,呢位「BB」仲係前立法會議員王國興嘅「骨肉」。她大爆話:「BB有王國興嘅汗味!」令全場都好驚嚇。
其實呢個「BB」係王任議員時,爭取侍產假時用嘅道具公仔,所以Alice就認為喺立法會再審議侍產假嘅時刻,要帶埋「BB」嚟聽會。
Alice話,佢嘅「BB」有同屬工聯會(工記)嘅前立法會議員王國興嘅汗味,笑言件BB衫好耐冇洗,攞去驗DNA都唔知驗到啲咩咁話。佢又話雖然王已冇做議員,但「BB」一直喺王以前嘅辦公室、即依家工記勞工界議員陸頌雄嘅辦公室中「供奉」,而今日都特登畀「BB」坐番王以前喺會議廳嘅座位、即依家工記立法會議員郭偉強個位。
睇番資料,王國興確係曾經喺立法會開會時抱過「BB」開會,雖然「BB」身上嘅衫唔同咗,不過Alice就聲稱「BB」有王陣味。
另外,Alice亦喺發言中鬧爆尋日(24日)發言時指勞工顧問委員會係「神主牌」嘅立法會議員許智峯(峯鴿)。Alice話勞顧會雖有工記代表,但亦有其他工會代表,佢哋都係經選舉選出嚟嘅,批評有人為咗政治目的攻擊工記,同時攻擊咗勞顧會,係對該會嘅侮辱咁話。