政Whats噏：用廚餘煎奄列　吳永嘉巧妙遮醜

煮嘢食講求色、香、味，唔單止要煮得好食，仲要講賣相。立法會議員吳永嘉(Jimmy)今日(2日)出席維園工展會入面嘅「名廚齊惜福」活動時就示範咗點樣「遮醜」，佢煎奄列嘅時候發現爐面唔平，都唔知係張枱定係平底鑊出事，總之就搞到有半邊蛋熟得快啲，另外半邊就冇咁熟，結果Jimmy上菜時就巧妙地將煎得靚啲嗰面擺上面，睇落咪煎得好靚囉！

雖然Jimmy嘅奄列唔算十全十美，但食用係絕對冇問題，只係賣相差咗少少，而最重要嘅係個奄列配合到活動嘅「惜食」主題，Jimmy話早前聖誕節參加過好多派對，唔多唔少都有食物剩低，所以佢就帶咗啲粟米、青瓜、洋葱返屋企再切粒，再拎過嚟喺今日活動上用，示範將剩食變美食。Jimmy仲話本身想用西瓜皮嚟煮，不過西瓜皮嘅廚餘實在太難搵，所以最後都係放棄咗咁話。