政Whats噏：麥美娟睇片操肌　立會爆混亂時企得穩

依家網絡世界嘅資訊多籮籮，唔少人都會透過睇短片學吓煮飯又或者做運動，立法會議員麥美娟(Alice)都唔例外，最近仲睇片做肌肉訓練添。早排Alice喺立法會曾經被推跌受傷，唔通依家秘密操練，想喺下次立法會混亂時紮穩馬步？<br/><br/>Alice今早(6日)喺立法會上發言時就自爆，話最近睇緊一條來自新加坡有關「Stand for strength」嘅短片，內容係要人先坐喺度翹埋手，再以單腳企起身。佢就話睇落好似好容易，但最初自己都做唔到，就發覺需要做運動，結果用兩個星期密密做運動，依家就做到喇。<br/><br/>之後Alice就話，上個月喺立法被推跌後，有醫生朋友就傳咗呢段片畀佢，建議佢做吓運動。佢就話有做開健身嘅朋友，一睇完段片就做到個動作，而自己本身好少做運動，依家睇完段片之後就會做吓拉筋，同埋柔軟體操嘅運動。佢仲建議，上咗年紀嘅人應該要做多啲運動，強化吓肌肉，避免關節損傷。