政Whats噏：無經費難撐　房屋政策評議會告別江湖

有40年歷史嘅房屋政策評議會(前稱公屋政策評議會)告別大家嘞！早喺80、90年代好有影響力嘅壓力團體公評會，近年的確沉寂好多，少就房屋議題發聲，該會主席鄭清發坦言無經費，難以維持落去，雖然好多朋友都話好可惜，住屋問題今時今日仍然嚴峻，但該會歷史任務應告一段落，無奈告別江湖。

房屋政策評議會尋晚(9日)喺大坑東擺下告別江湖英雄宴，筵開10席，籌得5萬多港元，作為結束該會嘅經費，支付欠款、核數同律師費等。包括民協前主席廖成利等好多政界中人都有出席晚會，大家都依依不捨。

70年代尾，隨住大坑東、李鄭屋、大窩口邨嘅7層大廈重建，多個組織成立公屋政策評議會。到80年代，公評會獲教會贊助經費，聘請全職員工發展會務，90年代改名為房屋政策評議會，全面關注整體房屋問題。40年來，房評會一直關注徙置區、天台屋、擠迫戶、租金問題、富戶政策、建屋速度、屋邨管理、公屋輪候等議題，並推動居民參與。