東網電視
更多新聞短片
香港末代港督彭定康又回魂指指點點。
古語有云：「不在其位，不謀其政」，不過就唔係個個都係咁做，好似香港末代港督彭定康（肥彭）咁，香港都回歸咗二十二年，但佢仲不時「回魂」，多次就《逃犯條例》修訂風波指指點點，今日（13日）接受外媒訪問時警告，若果中國介入香港，用「其他方法」應對香港示威行動，對中國同香港都會係一場「大災難」，又指事件已持續十周，希望中國國家主席習近平明白設法令市民團結嘅意義。
肥彭接受訪問時提到，若香港示威持續，而中國採用「其他方法」介入事件，將會適得其反，對中國和香港而言都會係「大災難」，甚至批評習近平自上任以嚟一直都鎮壓各地嘅異見聲音，等共產黨可以控制一切，認為香港需要嘅係一個和解過程。
肥彭甚至建議啱啱上任嘅英國首相約翰遜（Boris Johnson），向本周訪英嘅美國國家安全顧問博爾頓（John Bolton）爭取支持，確保中國唔會介入處理香港事務。肥彭唔單止不斷對香港事務指指點點，仲要篤住中國政府同英國政府要點做，呢個過氣港督根本唔知醜。
