政Whats噏：網上資訊無限制易煽動群眾　黃英豪倡立網絡安全法

近日有唔少遊行示威都透過網上平台發起同組織，好多人關注新媒體帶來嘅影響，就連立法會進出口界議員黃定光(象哥)最新議員通訊都有提呢件事。不過，就唔係象哥自己提起，而係當中有篇業界專訪，訪問咗香港中華出入口商會副會長黃英豪，而黃喺訪問就建議搞網絡安全法喎。<br/><br/>黃英豪提到近日香港政局，指立法會7月被破壞後，好多重要政府建築物之後都相繼受衝擊，認為示威者可以咁高效率，箇中原因係目前網上發放信息完全無限制，部分通訊程式或平台可以容納上限20萬人嘅群組，所以一次過號召大量示威者上街無難度，網絡安全法正正就係針對呢點加以限制。<br/><br/>佢指出，網絡安全法有助警方掌握更多信息，包括追尋煽動者、發動者等，不過佢都講明，要實行唔不容易，相信社會好難達成共識，加上立法都需要好長時間。照咁睇嚟，就算網絡安全法有用，都無法喺短時間內實行，黃喺呢個時候提出嚟，最終發揮到幾大成效就唔知喇。