政Whats噏:陳健波促大學校長道歉 要挾撤撥款

2019年11月23日 17:55
東網電視
更多新聞短片
波哥話大學搞成咁,校長同埋管理團隊一定要檢討吓。
最近理大同中大都有示威者爆發嚴重衝突,破壞及焚毀校園設施,立法會保險界陳健波(波哥)尋日(22日)就喺Facebook上載咗一條片,話大學搞成咁,校長同教職員有重大責任,希望每年700幾萬港元薪酬嘅校長同埋管理團隊一定要檢討,唔單止要向市民認錯道歉,仲要清楚解釋,好似要交代點樣糾正錯誤,如果唔係,市民唔想再浪費錢喺大學嘅呼聲只會愈來愈大,到時喊都無謂啦!
波哥解釋話,警方喺校園內檢到數以萬計汽油彈,又有大量極度危險嘅化學品遺失,對警察及市民都產生極大危險,大學被搞到烏煙瘴氣,好多市民都好谷氣喎。而香港法例規定大學有極大自主權,所以大學發生咁嘅事,一定要由大學管理當局負責,唔好諗住將責任推畀其他人咁話!
之後佢又話坊間已經指大學發生呢啲醜事,點解仲要每年撥220億港元公帑去支持佢哋去誤人子弟,不如將啲錢攞去資助香港學生海外或者國內升學,大學用地就用嚟改建公屋或者居屋,起碼可以住到幾十萬人喎。如果校方唔想變成咁,就一定要做啲嘢喇,要承諾唔會重蹈覆轍,以免大量家長痛心疾首。