政Whats噏:撤回所有開位申請惹質疑 議員轟政府做法不君子

20201127
東網電視
更多新聞短片
有議員擔心政府會「打茅波」,雖撤回開設職位嘅建議,但日後會留返喺《財政預算案》上審議。
自從民主派議員總辭後,拉布嘅場面應不虞再現,但唔等於政府提交畀議會嘅議案可以順風順水。日前政府宣布撤回所有開設職位嘅撥款申請,有部分建制派議員就質疑到底係「真撤回」還是「假撤回」,擔心啲建議會留返喺《財政預算案》上審議,其中議員陳克勤仲鬧爆政府做法不君子添。
喺政府宣布撤回之前,其實早已喺財務委員會上陸續咁撤回部分開位建議,有部分仲要傾咗一陣就撤回添。面對依家經濟下行,當時都有唔少建制派議員喺會上質疑開位嘅重要性,又認為政府都要壓縮開支,唔可以胡亂開位。今日(27日)正值內務委員會開會,繼關注防疫措施後,建制派議員就撤回開位建議提出質問,希望內委會主席李慧琼向政務司司長張建宗轉達。新民黨葉劉淑儀就質疑,政府到底係「真撤回」定係「假撤回」,同埋話議員只係對部分項目有意見,認為政府如果有需要,不妨可以先向立法會提交議案審議。
陳克勤就認為,議員審議政府開位嘅議案係以「是其是、非其非」、「實事實辦」嘅態度,如果冇需要就一定唔會支持。佢仲質疑,政府係咪想將啲開位建議放埋喺《財政預算案》,形容依個做法係「打茅波」,鬧爆係不君子嘅做法,認為政府應堂堂正正咁向立法會提交議案,唔好做小動作,要求澄清咁話喎。
議員謝偉銓就話,多個首長級開設職位嘅議案因黑暴事件而遭拖延,認為政府的確有必要重新檢視相關職位,係咪有需要開設,仲叫政府加快檢視唔好再拖。議員田北辰就認為政府唔應該矯枉過正,仲以鐵路拓展處為例,話有部分部門有增加人手嘅需要,政府應該要正視咁話喎。
另外,因應班民主派議員總辭,立法會有部分委員會需要再重新選出副主席及委員,而今日就分別選出議員謝偉俊、葛珮帆及張國鈞出人政府帳目委員會、議員個人利益監察委員會及議事規則委員會副主席。其中葛珮帆亦成為議事規則委員會委員。