政Whats噏：民政總署派1700萬口罩　區議員質疑分發標準

政府同今屆由民主派主導嘅區議會爭拗不斷，多區區議員早前指控當局阻撓區議會採購口罩等防疫物資，而民政事務局隨後就發聲明反駁，強調民政事務總署有向包括區議會等嘅團體，提供合共1,700萬個口罩。之不過，唔少區議員都話拎唔到政府嘅口罩，有人更引用《公開資料守則》向政府追數，結果發現獲政府發放較多口罩嘅團體都係來自親建制陣營，惹嚟唔少泛民區議員質疑當局分發口罩不公。

有區議員早前透過《公開資料守則》，要求政府交代分發有關口罩嘅資料，今日(2日)就得到當局回覆。有關文件中只係列明其中5區區議員獲發口罩，其中灣仔區議員合共拎到6.5萬個，屯門區議員就有16萬個。而中西區、東區同油尖旺區嘅數字就並冇獨立分項，而係計入當區民政事務處嘅總數當中，所以就未能得悉呢3區區議員分別拎到幾多個口罩。至於其餘13區，當局就冇再交代各區民政處有冇向當區區議員分發口罩。

有關資料被上載至社交網站後，隨即引嚟唔少泛民轉載，其中荃灣區議員趙恩來就指控民政總署，指當局並無向荃灣區議會分發任何口罩喎。佢又根據有關資料羅列獲發最多口罩嘅「大戶」，包括得到56萬個口罩嘅「香港中西區各界協會」，以及分別獲發30萬個口罩嘅「新界社團聯會」同「九龍社團聯會」等。

趙又提到，每個同鄉會各獲分發15萬個口罩，每個鄉事會亦各得10萬個口罩，反而荃灣區議會就一個口罩都拎唔到。而西貢區議員秦海城就講笑話，原來佢攞唔到民政事務總署嘅口罩，問題係出喺佢自己身上，事關自己並非屬於任何同鄉會，所以攞唔到口罩咁話喎。

對於有區議員質疑當局選擇唔同機構派發口罩嘅原因，以及獲發嘅口罩數量嘅標準等，我哋正就有關問題向民政事務總署查詢，暫時仍未獲當局回覆。之不過，無論民政總署點回覆都好，相信都平息唔到民主派對當局「大細超」嘅不滿，估計未來仍然會繼續追數，睇嚟民政事務總署署長謝小華有排煩喇！