政Whats噏:陳沛然困升降機 叫人放下屠刀 唔通遇賊?

2021年02月22日 23:37
東網電視
更多新聞短片
陳沛然(左)困升降機,叫旁邊嘅年輕人放下屠刀。
相信唔少人都試過困𨋢,醫學界議陳沛然近日都試過,仲叫𨋢內人放下屠刀,唔通佢咁黑仔遇到賊?
話說陳沛然今日(22日)喺社交平台上載咗段短片,見佢同一位後生仔同另一名女士一齊搭𨋢,點知突然一陣搖晃,3人被困𨋢內。後生仔急住出𨋢,仲跌咗啲嘢出嚟,陳隨即呼籲後生仔放下屠刀,立地......,吓!亮刀乎?非也,佢係話「戒煙啦」。其實嗰包係煙嚟。
畫面一轉,陳搵咗香港吸煙與健康委員會主席湯修齊,討論全面禁制電子煙及加熱煙嘅煙草產品。湯修齊話加熱煙同電子煙仍然存有傳統香煙嘅有害成分,更可能含有更多致癌物質,仲有可能因為新型煙草無乜難聞嘅氣味,而令人不知不覺間就接觸多咗二手煙同三手煙。
陳沛然話發現好多社交平同商場都有售賣同宣傳新型煙草,年輕人好易就可以買到新型煙,情況令人擔心。湯修齊就話根據2019年政府嘅統計數字,當中小學生曾經使用電子煙嘅數字更去到百分之一點四,加上電子煙包裝精美,家長難以發現。湯修齊話相信兩個仔女無接觸新型煙草,但身邊同學都有接觸過,情況令人擔心。