政Whats噏:三度「瑕疵」讀「瑕癖」 陳肇始抗疫滅鼠講嘢冇樣掂

20210324
東網電視
更多新聞短片
面對疫情,稱職嘅衞生官員至關重要,但陳肇始近年嘅表現,坊間普遍感到失望。
新冠肺炎疫情持續逾一年,政府喺抗疫方面表現成點,相信都有目共睹。負責領軍嘅食物及衞生局局長陳肇始經常被炮轟抗疫慢幾十拍,其他環境衞生嘅工作又求其了事,就好似滅鼠咁,滅極都滅唔完,仲要每隻成本都要成4000蚊,認真大花筒。作為政府官員,平時表現已經不濟,就連回應重大事件都可以連番讀錯字,竟將「瑕疵」讀成「瑕癖」!無論抗疫定係滅鼠,連讀稿都求其過人,難怪唔少市民都希望佢下台走人啦!
話說今朝(24日)復星藥廠通知政府,話「復必泰」疫苗藥瓶封蓋存有包裝瑕疵,需要煞停疫苗接種計劃,搞到唔少市民食閉門羹。計返日子,本身有批市民早於今個月初接種咗第一劑,原定於下星期就要接種第二劑,依家突然咁搞法,分分鐘會影響接種安排。
突然發生咁大件事,陳肇始喺立法會出席會議前,就被追問相關安排同埋資料,之不過佢就只係將政府所發出嘅新聞稿讀一次,被問到有幾多人受影響、幾多疫苗出事等就冇回應喇。以為照稿讀應該萬無一失啦,點知佢就將稿內嘅「瑕疵」讀成「瑕癖」,分別係「有啲包裝嘅『瑕癖』」、「就呢個『瑕癖』要進行調查」同埋「不過喺包裝上面,佢哋都係發現有『瑕癖』」,仲要連錯三次都冇為意添。
其實「瑕疵」同「瑕癖」發音差咁遠,陳咁都可以讀錯,真係咪話唔驚訝。說話一出,隨即引起網民熱烈討論,有網民話,咁簡單都可以讀錯,連字都未識學人做局長?仲有人笑言係咪打咗疫苗嘅副作用,怒斥佢字又唔識,鑊又唔孭,一味推卸責任,草菅人命喎。
但翻查資料,原來「瑕癖」真有其物,仲要係聲稱可以殺菌同強力去污嘅潔廁用品嚟,莫非陳肇始係想去潔廁?之不過佢平時滅蚊滅鼠冇料到,搞到啲老鼠通街走,抗疫又從來未好過,潔廁應該都做唔好啦。
其實面對疫情,相信市民都真係想要個好嘅衞生官員,早日幫香港驅疫殺菌、有能力帶大家走出「疫境」,可惜陳過去呢年嘅表現,實在令人失望。過去呢幾個月,坊間叫陳下台嘅聲音此起彼落,或者真係要換人,先可以滿足市民對衞生官員嘅期望啊!