東網電視
更多新聞短片
張國昌話上星期已提出退黨申請。(網上圖片)
繼公民黨及新民主同盟早前爆發退黨潮後，民主黨嘅東區南豐選區區議員張國昌最近亦退黨，莫非目睹唔少黨友官司纏身而決意割席？佢今日(25日)接受查詢時就證實消息，解釋話係因為家庭原因先退黨喎。
民主黨喺東區區議會本來佔4個議席，包括因涉違反國安法而被還押嘅該區議會副主席趙家賢、蘇逸恒及周卓奇及張國昌。不過，翻查區議會網頁嘅區議員簡介，見到張所屬政治聯繫一欄已留空，而民主黨網頁亦已將其資料移除。
喺2014年時任該選區區議員、同屬民主黨嘅梁淑楨因嚴重中風缺席多次會議，最終相關議席出缺，當時任梁議員助理嘅張國昌喺補選中勝出，並一直連任至今。
張回應退黨一事時話，今次決定涉家庭原因，上星期已提出退黨申請。至於係咪擔心喺國安法下掛住民主黨嘅牌頭會受牽連呢？佢就話冇補充喇。其實民主黨作為泛民大黨，喺依家嘅政治環境下，唔知會唔會好似公民黨咁觸發退黨潮呢？
