政Whats噏:林鄭公眾場合甩鞋 堪輿家:施政唔踏實有蝦碌

2021年03月31日 17:14
東網電視
更多新聞短片
官員甩轆就成日見,今次竟然仲有人甩鞋,講緊嘅咪就係特首林鄭月娥喎。唔知佢因乜事慌失失,仲要連鞋都甩埋呢?
有機構舉辦特區政府施政十件大事評選頒獎典禮,林鄭作為主禮嘉賓出席喺會議展覽中心舉辦嘅活動。當佢完成致詞以及頒獎儀式之後,步出會場時竟然喺人前甩鞋喎。
但係唔似畀人踩甩鞋,而係自己無端端甩踭喎。一隻蝦肉色嘅高踭鞋就孤獨咁企喺地氈上,而林鄭嘅玉腳都被傳媒影低。當時林鄭即刻回頭一望,急急着番好隻鞋。行行下竟然搞成咁,甩晒轆喇!
當年林鄭月娥宣布參選行政長官,在會展舉行「競選分享會」,林鄭在一班年輕人陪同進場亦曾發生甩鞋事件,穿在其右腳的平底鞋突然鬆脫,林鄭需要停下來重新穿上平底鞋,她其後在開場白自嘲論盡。
堪輿學家周漢明直指領導人每個動作都有預兆,而林鄭離開場合時甩鞋,鞋即係「履」,正正代表講嘅十件事中,有一、兩樣嘢唔夠踏實、無法履行。例如係控制疫情嘅工作唔理想,「甩吓甩吓」。而林鄭係甩咗左邊隻鞋,由於「男左女右」,周話由男性負責嘅野更加有機會甩轆啊。
堪輿學家麥玲玲直言,領導人喺公開場合甩鞋,喺意頭上令大家覺得係出現波折、沙石,實在麻麻哋。今次更加喺一個有關特區施政嘅活動上甩鞋,確係有啲蝦碌、出現反差。麥玲玲亦提到,呢件事令人聯想到唔少政客跌倒嘅場面,包括全國政協副主席董建華本月初列席全國人大會議開幕式上,不慎於台上跌倒、美國總統拜登日前登上空軍一號專機時,不慎連跌3次、以至時任英國首相嘅戴卓爾夫人喺1982年訪華,於北京人民大會堂外跌倒。