東網電視
更多新聞短片
徐英偉(左)同張進樂(右)同屬一個建制政黨。
加入政府「熱廚房」係咪好難捱？見仁見智喇！喺4月1日上任民政事務局政治助理嘅張進樂竟然年薪達146萬港元，相對佢前一份工嘅人工，多近一倍呀！但民政局就話146萬港元年薪只係預留請人嘅開支，張嘅月薪逾8萬港元。即係佢嘅月薪低過前政助黎穎瑜，但就比佢上一份工多約2萬港元。
民政局回覆議員就財政預算案嘅書面質詢，話喺2020-21財政年度，民政事務局局長、副局長和局長政治助理的薪金開支分別為407萬港元、313萬港元和117萬港元，而喺2021-22財政年度，局長同副局長嘅薪酬無變，但政助薪酬就有146萬港元。
眾所周知，黎穎瑜喺今年1月中以家庭理由辭職，而喺民政局嘅回覆中，喺2020-21財政年度政助嘅人工，仲特別標明「政助一職自2021年1月20日起懸空」，即係黎嘅年薪係117萬港元，月薪9.75萬港元。
咁2021-22財政年度，政助嘅年薪係146萬港元，即係張進樂嘅年薪加咗29萬港元，月薪逾12萬元，相對於佢之前喺民政事務局擔任研究主任，負責統籌研究項目嗰份工，月薪6.5萬港元，加咗近倍喎。
民政局回覆話張嘅月薪只係逾8萬港元。即係張進樂對上一份工約多2萬港元人工。實際上而按現行機制，政治助理薪酬為局長薪金的25%至35%，視乎個別決策局的安排，以及政治助理的年資而定，而146萬港元只係預留請人嘅開支。
現年29歲嘅張進樂喺香港中文大學主修政治與行政，亦係香港城市大學專業會計與企業管治學理學碩士學位，現為全國港澳研究會會員，但未上任前已有醜聞纏身。早前有報道指佢舊年11月加入政府前，仍一直擔任其開設私人公司嘅董事同股東，至12月底先離任，未有文件顯示張轉讓股份，被質疑未有作利益申報。再講，張進樂同局長徐英偉同屬一個建制政黨，之前已經畀人質疑係咪請「自己友」添！
