政Whats噏：尤漢邦辭任區議員後離港　指與香港死別

政府早前傳出區議員違誓會被追薪逾百萬港元方案，令多達260名區議員辭職，當中亦有唔少一併選擇離開香港。黃大仙前區議員尤漢邦係其中之一，喺今年7月宣布辭任短短6日就離港，到底現時身處何方則未見透露，但就話預計自己短則十年、長則一世都無法返香港。

尤漢邦早前接受傳媒訪問，話最難忘嘅從政回憶係舊年發起民主派「35+」初選時，睇到香港有希望，市民都開始踏入抵抗階段。不過正正因為自己有份設置初選票站，擔心會被追究而選擇離港。佢提到若然想「躺平」，喺香港都可以「躺平」，反而係想改變香港先決定離開，希望大家可以繼續追尋公義。問到佢有咩想同香港講，佢就話自己冇資格講，只係叫大家加油。

不過，尤漢邦都唔知呢個選擇啱唔啱，認為好似離棄咗坐監嘅同伴，對此覺得痛苦。