政Whats噏:5建制區議員請假 葵青區會法定人數不足流會

20210914
東網電視
更多新聞短片
葵青區議會今早流會。
葵青區議會今日(14日)召開大會,原定補選副主席,接替早前辭職嘅張文龍,但喺全部5名建制派區議員缺席下,導致流會,部分人解釋係因為仍未宣誓確認所有區議員,唔應該倉卒進行補選。據了解,建制派係唔想重蹈選主席嘅覆轍,將副主席一職又再落入泛民手中,所以寧願拖住先。
喺泛民主派辭職下,葵青區議會剩低12名區議員,泛民同建制分別佔7人同5人,但身兼支聯會常委嘅區議會主席梁錦威目前被還押,而另一名民主派區議員郭子健有傳身處海外,缺席會議。
大會嘅法定人數係6人,但開會時只有5名泛民區議員,眼見唔夠法定人數,秘書處職員即場致電畀建制派議員,當中民建聯盧婉婷喺電話中提到已請假,但職員就話收唔到。葵青民政事務專員鄭健惟有宣布休會,令到出席嘅政府官員白行一趟,包括葵青警區指揮官謝振中。
民主派嘅林紹輝質疑地區有唔少問題,加上多個部門首長列席,要求以研討會形式繼續開會,佢又嘲諷建制派係咪困?,批評流會浪費時間、人力同物力。佢仲話自己今日生日都照開會啦,建制派議員嚟唔到應該一早請假,唔好浪費大家時間以及公帑,亦令秘書處難做。佢話市民選出區議員都係希望協助反映問題,相信市民有眼睇。
另一區議員劉貴梅要求秘書處交代請假嘅議員名單,但職員只係話有5位議員請假,由於未能召開會議,即係唔屬於法定會議,毋須喺席上交代名單。
點解建制派咁啱一齊請假?睇吓另一民建聯區議員郭芙蓉事後喺社交平台嘅貼文就清楚。郭解釋,梁錦威早前喺選舉區議會主席期間,公然表明支持支聯會「結束一黨專政」嘅綱領,喺有違反《港區國安法》之嫌下,仍然順利當選主席,但唔夠兩個月就被警方拘捕調查。郭認為前車之鑑,喺未明確區議員愛國者身份下,倉卒選舉副主席並唔係為民上策,有負居民期望。至於同政黨嘅當區區議員盧婉婷同梁嘉銘亦有轉發呢篇貼文。
好明顯,建制派係想拖住先。有政界人士分析,正如今日咁,若果泛民同建制都有人出選,冇走票嘅情況下,得票只會係5比5打成平手,最後要抽籤,建制都有輸嘅風險,與其副主席職位有機會落入泛民手中,令佢哋包攬正副主席,倒不如等埋區議員宣誓,若果有泛民過唔到關嘅話,形勢就逆轉嘞!