政Whats噏：前區議員胡健民頂替陳帥夫　任政制局副局長

政制及內地事務局前副局長陳帥夫今年初因為健康理由請辭後，相關職位一直懸空。雖然本屆政府只剩低8個半月嘅時間，但政府今日(18日)宣布，委任大埔前區議員胡健民為新任副局長，胡將於本周三(20日)履新。胡回覆東網時話工作唔係視乎任期長短嘅，都係服務市民啫，佢希望上任後幫到政制及內地事務局局長曾國衞，為局長分擔，又話未來雖然有兩場重大選舉，但都唔會怕嘅，反而仲幾期待未來嘅工作喎。

今年2月，陳帥夫透露有高血壓家族史，即使服藥亦未能有效控制血壓，為顧及身體同埋家人，故惟有請辭，強調請辭決定同現時嘅政治氣候無關，亦無任何移民及其他「路數」，而自從陳帥夫辭任政制局副局長後，有關職位一直懸空，雖然當時嘅政府任期所餘無幾，但有傳政府仍然積極物色人選接替副局長。

喺人選方面，政圈曾先後傳出，副局長一職可能會由胡健民嘅黨友、議員鄭泳舜接任，但據聞因為現屆立法會工作繁重，唔適宜再抽走議員，最後先無疾而終。去到今年五月，又再有消息傳出會由該黨嘅副秘書長、油尖旺區議會前主席葉傲冬出任副局長，仲聽聞相關程序已經進入最後階段，但臨門一腳失落位置，而葉傲冬7月初時更向傳媒透露自己將轉投商界發展。

直到今年7月有傳媒披露，政府其實已經初步擬定胡健民為接任人選，但一直都未有定案，只係消息流傳，事隔3個多月，去到今日政府先至正式公布啊！ 雖然胡健民在任時間唔長，但未來仲會有兩場完善選舉制度後嘅重大選舉，立法會換屆選舉同行政長官選舉，加上政制及內地事務局範疇廣泛，喺搞「重頭戲」選舉外，仲有修訂私隱條例同反歧視法等事宜，亦有責任推動《基本法》同憲法教育，睇怕都係一份辛苦工，唔知道胡健民搞唔搞得掂喇！

胡健民回覆東網時話自己做咗社會服務20多年，同政府一直保持溝通，都有就唔同範疇交換意見，同政府都算熟悉。佢又相信政府招聘唔係單靠數個月時間嘅觀察，亦會考慮唔同範疇。

對於任期一年都唔夠，佢就話無論做咩角色都好，其實都係服務緊市民。佢話自己嘅初心不變，即使當時區議會落敗，都無停止服務社會，所以今次都唔會睇任期長短，只會繼續工作。佢又話上任後希望幫到局長曾國衞，分擔工作，以及同其他公務員合作。佢又話未來雖然有兩場重大選舉，係局方嘅重要工作，但都唔會怕嘅，反而仲幾期待未來嘅工作喎。

胡健民今年54歲，曾經做過輔警總督察，係民建聯成員。胡於2016年至2019年期間擔任大埔區議員，2019年未能連任區議員，但今年4月大埔新增分區委員會，胡就獲政府委任加入大埔南分區委員會喇！佢參與唔同政府諮詢同法定委員會，包括公民教育委員會、家庭議會及基本法推廣督導委員會的工作，以及任職輔警。佢擁有倫敦帝國學院機械工程學士學位，以及清華大學高級公共管理碩士學位。