港澳版>新聞>中港台
  • 政Whats噏:梁翊婷被革走擬另起爐灶 民主黨未定會否補選副主席

    香港時間
    2022年02月21日(一) 14:40
    東網電視
    更多新聞短片
    梁翊婷早前放棄就被革除黨籍提出上訴。
    1/2
    民主黨(白鴿黨)副主席梁翊婷因以個人名義擅自撐黨外立法會選舉候選人,日前被革除黨籍。之不過,外界指佢仍然未打算退出政界,仲諗住另起爐灶搞民生組織。該黨主席羅健熙今(21日)就話梁嘅離開對黨無咩影響,佢將來嘅發展都喺個人選擇,指「佢鍾意想點就點」。
    雖然梁已經被革除黨籍,當時回覆查詢亦對中央委員會嘅決定「一笑置之」,早前仲喺社交平台寫到「該告別的早應告別了」。不過有指佢繼續有「搞作」,會再成立民生組織喎。羅健熙就笑言呢個係佢個人選擇,加上佢嘅離開對黨都無咩影響,所以都無咩再討論嘅空間。
    至於白鴿黨自前年12月換屆,並選出25人嘅中委會成員,但自經歷初選案同擅撐立法會候選人事件後,現時人數已減大半至16人,其中副主席一職亦得返一人擔任。不過羅健熙就話暫時未有仔細討論補選安排,之後會睇吓點樣,亦都唔敢肯定喺咪會有補選,佢亦都補充任期都只剩餘一年左右,到時會再召開會員大會。
    翻查資料,當中有部分退黨嘅成員正在服刑、離港,其中前主席胡志偉、前副主席林卓廷同尹兆堅等人正服刑,而副主席李永達亦已離港。至於暫離港赴英嘅蘇逸恒亦因擅立法會候選人被革除黨籍。
    其實梁翊婷自從當時被紀律委員會調查,一直低調未有現身,羅健熙早前更指梁事發後未有出席中委會會議解釋,又拒出席紀委會聆訴及無提出上訴,過程中對該黨紀律不聞不問,亦唔尊重黨規。
    羅健熙稱梁翊婷鍾意點就點。(蔡偉洲攝)
    感謝您瀏覽東網。請按入詳細閱讀本網站所載之使用條款及細則私隱政策聲明,並須確定您同意接受有關條款及聲明的約束才可繼續瀏覽。