政Whats噏：再有技術問題　線上會議食衞局「蝦碌」

為防疫情傳播，政府代表同立法會採取線上會議開會已經有一段時日，但至今仍不時出現技術問題喎。立法會財務委員會今早(13日)舉行線上會議期間，食物及衞生局一度唔記得設定背景顏色，鏡頭前直接出現綠色布，及後連畫面都冇埋，搞到會議要暫停5分鐘。<br/><br/>話說今早嘅會議，議員梁熙發言期間出現線路唔穩定，令人難以聽清楚對話內容。當輪到醫管局代表回答議員質詢，鏡頭前嘅醫管局行政總裁高拔陞竟然只得半邊面，本來要有「食物及衞生局」同特區區徽嘅藍色背景就唔見咗，反而得番一塊綠色布。後來高拔陞隔離嘅職員就手指指，疑似畀手勢技術人員，無幾耐就轉番個背景。<br/><br/>本以為「蝦碌」嘢告一段落，但稍後輪到食物及衞生局局長陳肇始發言，就直頭連畫面都冇埋。財委會副主席陳振英初時話「唔緊要嘅聽到聲。」然而黑色畫面持續不斷，無奈之下惟有暫停會議5分鐘，等相關人士解決技術問題先至繼續開會。