政Whats噏:容海恩同袁弓夷脫離關係 稱袁彌昌理解

2022年08月05日 05:30
東網電視
更多新聞短片
保安局日前發文嚴厲譴責3人,話佢哋涉嫌違反《港區國安法》第22條「顛覆國家政權」罪。其中一人正係議員容海恩嘅家公、時事評論員袁彌昌之父袁弓夷。容今日(5日)發聲明,宣布同袁弓夷脫離爺媳關係,及後回應話老公袁彌昌知情及理解。
容海恩嘅聲明,題為「國之大義」,宣布與袁弓夷脫離爺媳關係。內文話「本人容海恩,作為留着大祖國之血嘅中國人,在國之大義的前提下,基於據國安處稱,袁弓夷先生涉嫌違反《港區國安法》中顛覆國家政權罪名,本人現宣布正式與袁弓夷先生脫離爺媳關係。」
東網向容查詢,佢回覆話國之大義同埋維護一國兩制係首要考慮,強調係極度緊要嘅事項,有責任立即表明立場,其他事項都唔會受到影響。對於屋企關係,佢話兩個囡當然仲細個,講咗都未必明白,但老公就知情同理解。
其實當日港府發文譴責後,容已經喺社交平台話,支持警方根據《香港國安法》第37條嚴厲依法打擊所有違法活動,以儆效尤。佢亦呼籲市民要同任何違反《港區國安法》嘅人士或組織劃清界線,切勿以身試法。