政Whats噏：公屋編配太遠導致不便　劉國勳促改革分配機制　

公屋輪候時間長，甚至有機會分配到邊遠嘅地區。議員劉國勳喺社交平台話，曾經接獲唔少公屋申請者求助，例如有住屯門嘅居民被編配粉嶺皇后山邨；相反亦有粉嶺居民被派到屯門菁田邨，搞到居民需離開原本嘅生活圈。<br/><br/>劉國勳今日(12日)同房屋局副局長戴尚誠視察皇后山，家訪兩戶皇后山邨居民。佢哋原本分別住喺屯門同元朗，坦言當日獲編配皇后山邨嘅時候，對係咪接受單位有所掙扎，因為既要離開原本嘅生活圈，又擔心之後嘅編配亦未必更好。其中住屯門嘅住戶，依家仲要往返屯門照顧年長嘅屋企人，小朋友亦要轉校返學。<br/><br/>有見及此，劉話編配公屋時應該更人性化處理，建議加入「幸福編配」嘅做法，例如增加可填選嘅地區範圍、設立機制等公屋戶喺一定條件下按需要交換單位等。佢話現時編配機制沿用多年，問題係申請人喺填選申請地區時，可選嘅地區範圍太廣闊，房署只會按填選嘅地區隨機編配。佢話雖則公屋申請人可獲三次配屋機會，但事實上過去5年，平均唔夠一半嘅申請人喺首次配屋就接受咗喇。