政Whats噏：立會前廳交流會周三舉行　討論免遣返聲請等6議題

政府將喺本周三(14日)下午3時至下午4時30分，喺立法會舉行第5次前廳交流會，舉行時間改為召開大會期間，屆時由政務司副司長卓永興帶領，保安局局長同民政及青年事務局局長等人亦會出席，並就6個議題討論，包括處理免遣返聲請、地區服務及關愛隊伍、消防安全、青年發展藍圖、打擊騙案及婦女事務。<br/><br/>出席今次交流會嘅官員，包括入境事務處處長區嘉宏等多個紀律部隊首長，政府新聞處處長陳偉偉同行政署長盧世雄都會出席。不過，今次嘅安排受到議員質疑，其中議員狄志遠日前喺立法會內務委員會提出，指前廳交流會同大會時間相撞唔理想。相反，議員陳克勤就唔同意狄嘅說法，認為星期三最多議員喺立法會，而平時好多會議都會「撞時間」，又稱「平時都唔係成日見狄志遠喺大會會議廳」。<br/><br/>特首喺今年7月帶領3名司長及副司長出席立法會前廳交流會，隨後3次交流會分別由政務司司長、財政司司長及律政司司長帶領相關問責局長出席。