東網電視
更多新聞短片
謝小華(左1)喺天文台嘅錄影室，一嘗報天氣嘅滋味。
唔少市民都會透過電視台嘅天氣預報，以掌握陰晴寒暑等重要資訊；若果喺公仔箱突然見到天氣小姐係環境及生態局常任秘書長(環境)謝小華，市民又會唔會覺得耳目一新呢？唔係講笑，佢真係對住鏡頭擺出報天氣嘅「甫士」喎！
話說今日(5日)下晝，謝小華隨同環境及生態局局長謝展寰、副局長黃淑嫻同署理氣候變化專員黃傳輝等人到訪天文台，了解部門提供嘅氣象同相關服務嘅最新發展。事後該局透過社交平台上載相片，當中可見佢哋喺天文台台長鄭楚明陪同下參觀錄影室，而謝小華就企喺綠幕前面，一嘗扮演天文台科學主任報天氣嘅滋味。睇姿勢，謝小華都似模似樣㗎，但佢報天氣有無「食螺絲」呢？咁就不得而知啦！
喺參觀後，謝展寰話天文台嘅工作極為專業，對支援相關決策局同部門嘅工作，以及氣象領域方面嘅國際及區域合作相當重要，而天文台亦會繼續透過外展同教育活動，提升公眾對氣候變化同影響嘅認識。
