東網電視
更多新聞短片
議員組隊參加照顧者盃籃球賽。（李志湧攝）
1/5
早前立法會足球賽復辦，成班議員組隊踢友誼波。為推動政府及市民多關注照顧者支援，社福界議員狄志遠今日(11日)舉辦活動，並聯同幾位議員同事組隊參與「照顧者盃」3人籃球賽。不過呢隊迷你版嘅議員籃球隊，竟有成員甩底、同埋有人遲到，喺咁嘅情況下，佢哋嘅臨場表現有無影響呢？
籃球賽喺荃灣某商場嘅室內3人籃球場舉行，本來議員隊嘅名單有李世榮、狄志遠、鄭泳舜、陳學峰同陸頌雄，不過陳同陸兩人未有露面，而鄭就遲到。結果首場賽事，議員隊由李世榮夥同狄志遠，另加一位外援以迎戰藝員隊。雖然對方有體型上嘅優勢，但頗具份量嘅李世榮亦唔輸蝕，投籃多次得手；狄志遠亦努力不懈咁喺籃底自由發揮，射咗幾球之後都成功拎到一分。
李、狄兩人打咗5分鐘就退下火線，交波畀啲後生仔繼續發揮。雖然最終落敗，但總算盡咗力。鄭泳舜雖姍姍來遲，其後都有落場露兩手。
喺籃球賽以外，商場內設有多個攤位及展板，讓大眾多了解照顧者面對支援不足等問題。勞工及福利局局長孫玉菡亦在場佢認同現時照顧者津貼有優化空間，而照顧者專線及網站亦會即將啟用，未來會持續推廣協助照顧者工作。孫又指需要與照顧者嘅群眾增加接觸，並思考如何令資源到位。而活動嘅參與機構，包括香港婦女勞工協會、香港善導會、自閉症病人自助組織、工業傷亡權益會。
李世榮亦見功架。（李志湧攝）
孫玉菡(中)到場分享。（李志湧攝）
狄志遠打籃球都有板有眼。（李志湧攝）
鄭泳舜到場露兩手。（李志湧攝）
