東網電視
更多新聞短片
葛珮帆早前亦到內地參觀新能源同科技發展。
社會復常，唔少市民都走出去，立法會都唔例外。唔單止有事務委員會諗住外訪，部分事務委員會亦考察內訪。好似身兼環境事務委員會主席嘅葛珮帆(EQ)，早前已聯同相關團體到內地考察新能源發展，而事務委員會亦擬於下月27至29日組團內訪，考察當地嘅新科技同焚化設施，希望香港可以追落後。
雖然港府大力推動電動車，但配套措施差，叉電站又少。根據環境事務委員會嘅文件話喺訪問嘅3日嘅行程中，會參觀廣州市內電動公共交通訪施，亦會到佛山睇吓市內氫能應用技術、加氫站同氫能公共交通，睇吓有乜嘢借鏡嘅地方。
港府話要喺源頭減廢，但講咗咁多年垃圾問題仍然未解決，仲話可能喺北部都會區搵地發展轉廢能嘅設施，勢必又惹起爭議。而委員會嘅內訪行程亦會睇吓內地轉化為能嘅先進技術，期間會去參觀南山能源生態園中嘅垃圾焚燒發電廠。
今次訪問估計參與嘅議員同職員約為30人，同行嘅環境及生態局、環境保護署同機電工程署人員約15人。外訪嘅經費，每名議員粗略估計每位5900港元。
