東網電視
更多新聞短片

梁灝文話呢幾個月先後畀人偷銀包、撞車跌電話同跌傷腳。
1/2
若果係呢4個月內,經歷過畀人偷銀包、撞車跌電話,甚至碌落樓梯,係咪算黑仔呢?人有三衰六旺,衰咗三樣嘢,係咪變好運呢?
邊個咁黑仔呀?咪係屯門區議員梁灝文囉!佢喺交平台貼文同上載咗包晒紗布嘅痛腳相,話復活節假期後去九龍塘返學,落堂就放學走啦,點知見人多等𨋢就改行樓梯。佢話已經無一路行、一路睇電話,但唔知做乜神推鬼擁,行行下就差錯腳,結果碌咗落樓梯,佢話好彩行到樓梯尾聲先差錯,否則就真係練得成無敵風火輪嘞!
佢都話精神狀態一差就影響埋身體,從而體現出精神健康嘅重要,又形容呢次碌落樓梯算係不幸中嘅大幸,事關無整到骨,應該好快可以好返。今年過咗三分之一就衰咗三鑊,佢都話今年運氣好似差啲,最近仲諗緊唔知到今年結束時會遇到過啲乜嘢事?會唔會要入幾多次醫院?畀人偷更多嘅嘢呢?
好高負能量喎。佢都話向好嘅方向諗啦,之後嘅日子可能應該會變好嘅,佢自言係一個幾強迫自己嘅人,所以呢次跌傷亦都可能係一個信號,再提一提佢無論工作定學業,都要再放慢少少個腳步,事關時刻都迫到太緊可能真係唔得,要攞一個適合啲嘅節奏,唔好亂諗啲咩,放平啲個心,等個人靜啲、平穩啲喎。

碌落樓梯跌傷,隻腳包晒紗布。