政Whats噏：區會任期將屆滿　伍月蘭轉行報天氣？

區議會仲有幾月就要換屆，無意連任嘅區議員都係時候諗吓日後嘅出路問題。深水埗區議會副主席伍月蘭喺社交平台上載相片，但見身穿桃紅色外套嘅佢企喺一幅衞星氣象圖前面比畫，而貼文就指明日(12日)有雨，氣溫23至24度。莫非佢打算轉行，走去報天氣？

儘管有網民懷疑係「P圖」，但伍月蘭強調佢係實地參觀天文台，只不過喺電視報天氣個畫面作狀影張相咁啫，於是有人嘲笑佢係「天文台高級文學主任」。對於今次到訪天文台，伍月蘭話大開眼界，學咗好多嘢，又指天文台嘅主任都身兼數職，真係好勁咁話。

早前伍月蘭向傳媒透露，指即使熟悉區內事務亦未必可取得三會嘅提名門檻，因此佢有意退休。對於網民叫佢直接轉行報天氣嘅建議，伍月話嚟緊真係要轉行，之不過，佢是否具備報天氣嘅資格呢？咁就不得而知啦。