東網電視
更多新聞短片
李鎮強(右後)不惜踎低唱歌，嚟遷就鏡頭角度。
雖然「立會男團」係業餘性質，但佢哋上台表演就同專業歌手一樣，既要講唱功，仲要有台風。議員李鎮強作為男團成員，日前喺北角社區會堂獨唱嘅時候，竟然唱到踎喺度喎！到底佢唱緊邊首歌，要用咁奇特嘅台風呢？
其實李鎮強喺舞台上一路唱一路踎低，係要遷就鏡頭角度。話說李鎮強當時選唱台灣歌手黃品源嘅經典名曲《你怎麼捨得我難過》，期間議員陳凱欣走近台前，背向李鎮強舉起手機自拍，而佢呢個動作隨即惹嚟在場其他議員同事加入，李鎮強見台下影合照咁熱鬧，自己又點可以無份呢？咁就難免要稍為屈膝啦！喺台下嘅林素蔚同郭偉強都好識做，順勢用手指指向舞台，好讓焦點落番喺李鎮強身上。
今次合照嘅效果如何？可能要當日出席活動嘅議員至知啦！至於影完合照嘅李鎮強，踎低起身冇頭暈，唱歌依然好中氣無走音。
