10點半起辣慶個場　睇入波睇到傻！

收看直播，請按直播ICON，或按下面鏈結：

https://bit.ly/2L4lokR　

今晚東網直播德甲，10點半利華古遜對奧格斯堡，壓軸戲深夜1點半哈化柏林主場對法蘭克福，兩場四隊都係神經刀，睇足5粒鐘入球騷！其中哈化對法蘭克福，東網安排咗Oscar同蘇雞為大家評述，雙方近期前線都着晒火，而且同樣喜歡擺大個頭，兩軍三叉戟進攻組合互插好睇過戲，中位數2.5球大盤走唔甩。（on.cc東網周日凌晨1時30分直播）

哈化法福三叉戟互插

首都球會哈化柏林喺主場出擊表現向來都有保證，今季6仗只輸過畀RB萊比錫，所贏嘅對手仲包括目前聯賽榜二哥慕遜加柏同班霸拜仁慕尼黑。哈化較早前經歷低潮，教練戴達決意同時起用兩老一嫩嘅三位攻擊手，34歲嘅伊比斯域同33歲嘅沙洛文卡勞既有級數亦有佳態，前者近兩輪聯賽都有波入，配合活力十足嘅戴菲沙爾基攻堅，前線火力唔講得笑，球隊防線有唔少傷兵，今仗隨時以攻代守全力爭勝。

法蘭克福係今季德甲神奇球隊，較早前保持住連續11場正式賽事10勝1和佳績，直至上輪至突然失準畀禾夫斯堡偷到雞，好在剛過去嘅周中冇比賽回夠氣，相信今季合共已經入咗24球嘅三叉戟盧卡祖域、列比錫同施巴斯坦賀拿都磨拳擦掌，要喺首都爭取入球，今場入波唔會少！

利華奧堡強陣大駁火

如果嫌哈化柏林嗰場波嘅2.5球大盤得1.58倍太熱，黑柴建議玩過關，串埋早場上演嘅利華古遜對奧格斯堡，同樣揀2.5球大盤，買番條2串1過關，乘埋有2.37倍就有博彩價值，而且仲可以玩足5粒鐘，開到入球騷就過足癮，呢場東網安排咗英語評述，大家記得捧場啦！（on.cc東網周六晚10時30分直播）

利華古遜今季踢咗好多場經典好戲，包括德甲作客大勝雲達不來梅6比2，同德盃作客怒炒慕遜加柏5蛋，不過佢哋喺主場往往攻得太急，防線甩漏相當嚴重，面對多蒙特同賀芬咸呢啲擅反擊球隊就輸到2比4同1比4，教練靴歷治執唔掂防線惟有以攻代守，球隊目前排到第11位肯定唔合格，全隊都有決心力爭上游，上輪作客對紐倫堡原本好有決心，可是喺暴雨下作戰嚴重影響組織，結果畀吓吓去盡嘅紐倫堡逼和，今晚返主場肯定要發洩。

奧格斯堡近期3連敗亦要踢爭氣波，佢哋作客一樣唔會主守，今季7場作客賽事就有5場開出大盤，今場仲有王牌前鋒艾費特芬保加臣傷愈復出，入波機會相當樂觀，預期又係一場入球騷。