拉舒福特做抗疫英雄！獲頒MBE勳銜

《英超刨績王》加強版，最強數據一網打盡：http://win.on.cc/football/　

曼聯前鋒拉舒福特近期場內表現麻麻，但場外就獲得重大成就，佢因為積極參與消除兒童貧困嘅慈善活動，將獲英女王伊利沙伯二世頒發大英帝國員佐勳銜(MBE)。

拉舒福特喺上季英超停擺期間，同慈善機構FareShare攜手，發起為英國兒童籌募善款及食物，結果只係1星期就籌到近2000萬鎊(約1.9億港元)款項及物資。

呢位英格蘭國腳喺6月發表公開信，呼籲英國政府唔好因為暑假，而暫停向基層學童提供免費膳食嘅計劃，起初被政府拒絕。不過，「福仔」並冇放棄，不斷喺社交網發表溫情貼文，包括以個人經歷解釋計劃嘅重要性，最終成功令英國首相約翰遜改變主意，延長計劃，令130萬位學生受惠，獲得社會讚頌，並入選授勳名單。

將於月尾踏入23歲嘅拉舒福特對於獲得授勳，感到非常驚喜，佢話從來冇諗過會獲得呢個殊榮，對於佢自己及家人都係一項至高榮譽，並揚言會繼幫助社會中有需要嘅人士。由於「學生免費膳食計劃」因為學期即將結束，又會暫停，「福仔」趁今次獲頒MBE勳銜，再次呼籲英國政府延長計劃，幫助學生抗疫，果然好有善心。

拉舒福特現時正為英格蘭備戰周一(12日)凌晨歐國聯主場對比利時，繼續為國出力。