超激！里昂絕殺摩納哥　完場開拖5人被逐

足球博彩神器，每日重心提供盡在《彩報》：http://win.on.cc/football/　

今季法甲爭逐激烈，依家前4名球隊只係相差6分，周一(3日)凌晨嘅爭標大戰更加踢出極濃火藥味，排第3位嘅摩納哥主場2比3不敵里昂，痛失相當關鍵嘅3分，完場後雙方爆發大規模衝突，兩隊職球員互相推撞情緒激動，有人更被握跌喺地上，結果全場有5人被逐離場。

摩納哥今場如果贏波，就可以同榜首里爾拉近至2分差距，戰意高昂下開波25分鐘由禾蘭入波領先，不過同樣要爭入前3嘅里昂，下半場大發神威，迪比57分鐘追成平手，即使里昂中場卡基列70分鐘兩黃一紅被逐，客隊77分鐘再由馬些路安東尼奧入波反超前。

去到最後階段高潮迭起，摩納哥86分鐘由賓耶達射入12碼追成2比2，但里昂17歲新星卓基完場前1分鐘絕殺，帶領里昂贏3比2。完場後雙方球員出現口角，之後更演變成大規模衝突，雙方職球員互相推撞，最終球證再將4人驅逐，包括里昂嘅迪施基利奧同馬些路安東尼奧，以及摩納哥嘅基奧保斯同皮亞圖柏歷基