日本狂勝10比0　大迫勇也轟入5球

即上《美職刨績王》：https://win.on.cc/football/league/mls/index.html　

世界盃外圍賽亞洲區F組，日本展開一場大屠殺，主場以10比0狂勝緬甸，效力德甲球隊雲達不來梅嘅前鋒大迫勇也，今場射入5球，非常誇張。日本6戰6勝，合共轟入37球，成為首支晉級第3圈外圍賽12強嘅球隊。

日本上輪外圍賽以14比0狂數蒙古，創出球隊史上最大勝仗，今場亦唔手軟，開波8分鐘就由南野拓實射入，打開紀錄，呢位被利物浦外借去修咸頓嘅進攻中場今仗射入2球。

不過，主角係大迫勇也，呢位31歲射手上半場已經完成帽子戲法，下半場再有2球進帳，一人獨取5球。

日本另外3個入波都係由「海外兵團」球員射入，包括效力葡超球隊辛達卡拉嘅守田英正、法蘭克福中場鎌田大地、格羅寧根後衞板倉滉。

日本贏波之後，喺F組6戰6勝，領先第2位塔吉克8分，提早2輪打入第3圈12強外圍賽。