防暴警保護尼馬開角球　馬賽悶和PSG

足球博彩神器，每日重心提供盡在《彩報》：http://win.on.cc/football/　

周一(25日)凌晨法甲重頭戲，巴黎聖日耳門(PSG)作客死敵馬賽，氣氛相當熾熱，主隊馬賽球迷比賽期間不斷向球場內擲物，巴西球星尼馬去開角球嗰陣，一度要防暴警察拎住盾牌去保護。最終PSG攻唔入馬賽嚴密防守，踢成0比0完場。

PSG今場再派美斯、尼馬、基利安麥巴比嘅「MNM」進攻組合，不過面對馬賽未見上風，美斯喺25分鐘曾經頭槌攻門中楣彈出。踢到54分鐘PSG更受到致命打擊，右閘阿舒拉夫撞跌單刀嘅辛基斯安達，被球證直接紅牌趕出場，10人應戰嘅PSG最終都保住不失，同馬賽各得1分。

美斯今場又食白果，仍然未搵到自己第1個法甲入波。呢位阿根廷前鋒相當冇運，今場頭槌中楣，係佢加盟PSG以來第5次中柱/中楣，目前美斯3個PSG入波都係嚟自歐聯，反而喺4場法甲賽事都未入到波。