【官宣】列斯占士續約　車仔最高薪後衞

足球博彩神器，每日重心提供盡在《彩報》：http://win.on.cc/football/　

英超勁旅車路士周一(5日)宣布，22歲右閘列斯占士同球會續約6年，合約去到2028年先至完結。據報新合約周薪高達25萬鎊，令佢成為車路士史上最高薪後衞，亦係當今球壇第2高薪閘位球員。

英國《每日郵報》報道，車路士班主保利推行新政策，向25歲以下球員開出6年至7年長約，好似新加盟嘅韋斯利科芬拿就簽約7年，古古列拿、布查等就同列斯占士一樣簽約6年。列斯占士續約後表示：「我開心到飛起，要多謝新班望同球會所有人，我6歲已經支持車路士，續約係因為呢度係我想踢波嘅地方，我相信未來幾年會有機會贏好多獎盃。」

列斯占士新約周薪達25萬鎊，係球會史上最高人工後衞，而環顧現今球壇嘅閘位球員，只有巴塞隆拿左閘佐迪艾巴(35萬鎊周薪)比佢更高人工，而列斯占士嘅隊友古古列拿(17.5萬鎊周薪)同芝維爾(19萬鎊周薪)，都係當今10大最高薪閘位球員之一。