加盟港會首戰職業賽場 李小恆把握「空檔年」爭佳績

20221206
東網電視
更多新聞短片
港會開季以來戰績驚喜連連,除了在聯賽賽和冠忠南區外,更曾經作客擊敗深水埗和標準流浪,於「足總盃」首圈更淘汰晉峰。其中擅於盤扭的李小恆(Merkies),更令球迷眼前一亮,這位來自法國的年輕人,今季首度踏足職業賽場,他希望能夠成為球隊的常規正選,盡力為港會爭取成績,在球場上展翅高飛。
在巴黎鄰近地區出生的Merkies,小時候接觸過不同種類的運動,例如游泳及網球等,最終Merkies被足球深深吸引:「每次踢波嗰陣,都覺得呢個運動好好玩,同埋喺電視見到基斯坦奴朗拿度同美斯嘅比賽,真係好好睇,好多人都會想踢到佢哋咁勁。」不過,他當時只視這項運動為興趣,直到約12歲時開始受到當地球探注意,就令其決定向足球方面發展:「12、13歲嗰陣,有啲球探嚟睇我比賽,我由嗰陣先開始認真對待足球。」
Merkies於2016年,跟隨母親來到香港,他坦言起初誤以為足球在香港並不流行,因而希望繼續在歐洲生活:「我嗰陣仲想留係歐洲踢波,同埋以為足球喺香港唔太流行,但後來加入咗港會青年軍,可以繼續踢波,日子都過得幾開心。」李小恆加盟港會青年軍至2019年,之後到法國升讀大學,現時尚有兩年才畢業的Merkies 選擇今年為「空檔年」(Gap Year):「今年係我嘅Gap year,令我可以專注踢波,今季完咗之後會再決定未來嘅打算。」
「地標戰」贏波畢生難忘
港會今季首場聯賽以1比0擊敗深水埗,李小恆當時後備登場,上演職業生涯「地標戰」,Merkies回想起來仍然感到相當興奮:「對深水埗嗰場聯賽,對我嚟講係好重要嘅時刻,因為嗰場比賽代表職業生涯正式開始,嗰場球隊仲贏埋波,所以印象好深刻。」Merkies形容當時在場邊準備入替時,感覺猶如達成一項成就,但他相當清楚,這場比賽只是其職業生涯的起點:「我嘅職業生涯只係啱啱開始,仍要不斷努力,盡力表現自己嘅實力,希望可以有美好嘅將來。」
母親「開綠燈」 足球夢啟航
許多人小時候都有個「足球夢」,不過最終夢想成真當上足球員的僅屬少數,畢竟「職業足球」是一個汰弱留強的行業,因此Merkies也曾與家人出現意見分歧:「我想踢更高水平嘅足球比賽,但屋企人想我畀心機讀書,因為佢哋覺得如果踢唔成職業足球,都可以搵到嘢做。」為人父母,儘管其想法與子女有衝突,但終歸只是想確保孩子可以健康成長。因此,當Merkies的媽媽了解到其子有力朝足球發展後,也願意「開綠燈」:「媽咪對足球認識唔深,所以佢問教練意見,最後媽咪都畀我踢波,依家我哋喺香港一齊住,佢畀到好大支持我。」
【李小恆檔案】
姓名:Raphael Merkies
出生日期:2002年 4月15日(20歲)
身高:1米82 司職:左翼
球衣號碼:19 現效力球隊:港會
曾効力球隊:
Noisy Le Grand FC、FC Bry、巴黎聖日耳門、阿積士(青年軍)