女三獅勇挫澳洲女足　首進決賽

周三（16日）晚女子世盃4強戰，英格蘭女足憑艾娜東妮、蘿倫漢普同阿歷西亞蘿素各省1粒，以3比1擊敗東道主澳洲女足，首次殺入決賽，將於嚟緊周日（20日）與西班牙女足爭冠。

澳洲女足上仗同法國女足激鬥至互射12碼先晉級，搏得咁盡未回氣，因此一開波就畀英格蘭女足控制大局，先有佐真娜絲坦威近射被救出，去到36分鐘輪到前鋒艾娜東妮接應一次左路橫傳，勁射破網打開紀錄。

易邊後澳洲女足不斷用高空轟炸，可惜收效不大，反而前鋒森卡爾出其不意嘅遠射靚波，收死「女三獅」門將瑪莉伊絲扳平。不過71分鐘後衞艾莉卡賓達同門將麥堅絲阿洛特發生誤會，畀英軍前鋒蘿倫漢普後上攝贏快射得手，完場前佢再妙傳阿歷西亞蘿素埋齋，最終贏3比1，歷史性首度進身決賽。