加度素成馬賽新帥　首仗領軍即遇勁敵

法甲球隊馬賽宣布，聘請意大利名宿加度素為新教練，但雙方僅簽約至明年6月，似乎球會對於呢位球壇「硬漢」執教能力有保留。加度素第1場領軍將於10月1日凌晨法甲作客勁敵摩納哥，跟住歐霸盃鬥白禮頓，勢必面臨重大考驗。

馬賽今季成績欠佳，踢6場聯賽只有2勝3和1負，上仗更以0比4大敗於巴黎聖日耳門腳下，前教練馬些連奴早於9月20日已經辭職，會方經過一輪挑選之下，決定聘請加度素執教。

呢位45歲少帥曾經執教AC米蘭、拿玻里、華倫西亞等球隊，但成績欠佳，今年1月被華倫西亞炒魷後，一度未有教職，依家終於有工開，但雙方只係簽短約，預料加度素屬於過度性人物。

值得一提，另一支法甲球隊里昂原本都有意搵加度素領軍，但最終聘請另一位意大利名宿格羅素執教，2人球員時代曾經一齊協助意大利捧2006年世界盃冠軍，依家有機會喺法甲交鋒。