東網電視
更多新聞短片
加拿祖行為受到批評。(Getty Images)
曼聯喺歐聯作客3比4輸畀哥本哈根，阿根廷新星阿歷真度加拿祖賽後受到炮轟，佢喺哥本哈根球員主射12碼前，企圖「翻炒」上輪踩爛草皮嘅古惑招，不過今次就被對方球員發現並成功阻止，哥本哈根球員賽後炮轟加拿祖幼稚，係「小丑」嘅行為。
曼聯上月底主場1比0贏哥本哈根，完場前奧拿拿救出12碼，鏡頭影到加拿祖喺佐敦拿臣操刀前，靜靜雞去12碼點踩爛草皮，影響射門質素。今仗曼聯再被罰12碼，估唔到加拿祖想故技重施，但哥本哈根上咗一次當仲點會唔醒水，結果奸招告吹。
哥本哈根中堅華夫路爆料：「我見到加拿祖又想去12碼點搞事，奇雲迪斯即刻企喺佢面前擋住佢。佢又想出多次古惑，仲要喺我哋個主場？我認為呢啲係小丑嘅行為，思想非常幼稚。」加拿祖喺般奴費南迪斯下半場入波領先3比2後，又向住丹麥球迷做出「收聲」嘅挑釁手勢，最終哥本哈根反勝4比3「復仇」成功。
