東網電視
更多新聞短片
列斯占士係容易受傷的男人。(Getty Images)
英格蘭周四(9日)公平今個月歐國外大軍名單，入選球員都係「熟口熟面」冇大驚喜，不過喺車路士復出冇耐嘅列斯占士，就被爆拒絕徵召，領隊修夫基表示明白呢位車路士隊長嘅做法，但就警告佢放棄今次機會，可能影響佢參加明年歐國盃嘅機會。
已經出線歐國盃嘅英格蘭，今個月將對馬爾他同北馬其頓，不過修夫基點兵冇打算試陣，繼續用番常規國腳，只有哥林威爾遜獲重召較特別，不過修夫基自爆本來想召入列斯占士，但就被對方拒絕：「我想選佢入隊，但佢覺得未預備好，我明白佢嘅憂慮，但當中都有風險，英格蘭右閘有好多出色球員，喺歐國盃前只係得番1個國際賽期機會畀佢。」
英格蘭有基爾獲加、捷比亞同改踢中場嘅阿歷山大阿諾特可以勝任右閘，加上未有入選嘅賓韋特同紐卡素新星利夫拿文度等等，經常傷患纏身嘅列斯占士未必保證可以入選決賽周大軍。
