東網電視
更多新聞短片
沙拿係埃及王牌球星。
星期一(20日)凌晨世盃外非洲區賽事，埃及作客2比0擊敗塞拉里昂，喺A組2戰2勝排榜首。今場比賽出現火藥味，塞拉里昂最後只得9人應戰，完場前多名主隊球迷闖入球場，而且衝向穆罕默德沙拿企圖施襲，好在保安同隊友幫手阻止，最終沙拿要由軍人護送離場。
埃及今場由馬莫特查斯古特包辦2個入球，沙拿雖然冇入波但亦交出助攻，主隊球迷就對球證執法表示不滿，事關塞拉里昂有2名球員先後被逐。去到臨完場階段，有球迷衝入場內搞事，迅即被多名保安制服痛打，突然再有幾名球迷衝向沙拿方向，好在隊友艾比度蒙恩挺身阻止對方埋沙拿身。
球迷衝人場企圖襲擊沙拿片段：https://twitter.com/i/status/1726300972916548091
沙拿最終由軍人護送離開球場，踢足90分鐘嘅佢亦未有受傷。31歲嘅沙拿係埃及爭奪世盃入場券嘅關鍵人物，佢哋上場6比0大勝吉布提，呢位效力利物浦嘅前鋒就個人獨取4球。
