犀利！曼聯完成「11月最佳獎項」帽子戲法

曼聯雖然喺歐聯瀕臨出局，但聯賽表現唔錯，近5場英超取得4勝1負，包括11月3戰全勝兼不失球，結果坦哈格、哈利馬古尼、阿歷真度加拿祖分別獲得英超11月最佳領隊、最佳球員、最佳入球，完成「獎項帽子戲法」。

包括上季在內，坦哈格執教曼聯以來，已經3次當選英超月份最佳領隊，紅魔鬼史上僅次於27次拎獎嘅費格遜。至於季初一度面臨被出售嘅哈利馬古尼成功大翻身，重奪正選位置，上月3場英超，佢都踢足全場，協助球隊保持清白之身，當選最佳球員絕對實至名歸，呢位英格蘭國腳亦成為自2009年1月尼曼查維迪之後，首位獲此殊榮嘅曼聯後衞。

阿歷真度加拿祖對愛華頓，以倒掛金勾射入，當選11月最佳入球，盧頓門將湯馬士卡明斯基對水晶宮，連環撲救，獲得最佳撲救獎。