悲情！薩克達9分出局　公平咩？

周四(14日)凌晨歐聯H組生死戰，波圖主場以5比3擊敗薩克達，取得次名出線權，烏克蘭球隊薩克達即使有9分，但只能以第3名轉戰歐霸盃，反觀A組哥本哈根、F組巴黎聖日耳門同樣得8分，卻可以晉身歐聯16強，薩克達可以話係今屆最悲情球隊。

雙方賽前同分，由於波圖首循環贏過薩克達，今場和波都可以憑較佳對賽成績出線，但呢支葡萄牙勁旅仍然主動出擊，開波9分鐘由中場加連奴近門射入打開紀錄。

薩克達亦不甘示弱，由施簡射入空門，雖然旁證一度指越位，但球證睇完VAR之後判入波有效，扳平1比1。

波圖加強攻力，由加連奴、泰尼米各建一功拉開紀錄至3比1，即使中場尤斯達基奧擺烏龍，但老將比比及後備上陣嘅法蘭斯高干斯卡奧各入1球，領先至5比2，薩克達臨完場前由艾古拿度入波追番1球都無補於事。

由於俄烏戰爭，薩克達今屆歐聯主場賽事只能喺中立場德國舉行，本身已經輸蝕，依家仲要「高分出局」，令呢支爭戰禍影響嘅球隊再添多一份悲情。