東網電視
更多新聞短片
AC米蘭中堅湯姆利上半場入波，但下半場受傷。(Getty Images)
周六(23日)凌晨意甲出現冷門賽果，AC米蘭作客只能逼和包尾球隊沙蘭力坦拿2比2，連1.28倍客W都開唔出，A米更加損兵折將，2位中堅卡積亞、湯姆利不幸受傷，令原本已經不穩嘅防線雪上加霜，AC米蘭今季想爭標，可以話係舉步維艱。
AC米蘭過去4場聯賽取得3勝1負，走勢唔錯，今仗面對魚腩球隊沙蘭力坦拿，亦由中堅湯姆利近門頂入打開紀錄。不過之後形勢出現大逆轉，臨完上半場，沙蘭力坦拿靠中堅法斯奧頂入扳平1比1，換邊後老將簡達華遠射入網反超前。
AC米蘭要踢到補時，先至由後備上陣嘅前鋒盧卡祖域射入逼和2比2，現時落後榜首國際米蘭8分，兼踢多1場。
AC米蘭最大鑊係2位中堅卡積亞、湯姆利今仗一齊傷出，期間需要派18歲小將真卡路史米上陣扼守中路。值得一提，卡路史米上仗對蒙沙，曾經入1球，呢位塞維爾亞小國腳或者可以趁A米防線人腳告急，爭取上位。
