【官宣】雲迪碧克投法蘭克福　買斷費勁平

曼聯冬季清洗行動展開，荷蘭中場雲迪碧克正式外借至德甲法蘭克福至季尾，而且合約仲有買斷條款，法蘭克福只要畀1,210萬鎊(約1.2億港元)就可以得到呢位26歲球星。

26歲嘅雲迪碧克喺曼聯唔受重用，今季各項賽事加埋只踢過21分鐘，據報法蘭克福今次會支付少量借用費，但會承擔佢大部份人工。法蘭克福總監馬古斯高斯治表示：「雲迪碧克同法蘭克福嘅踢法係天作之合，佢係球隊嘅重要拼圖。雲迪碧克嘅國際賽經驗對陣中年輕球員會好有幫助，亦會令我哋嘅進攻更有威脅。」

雲迪碧克嘅紅魔生涯好大機會完結，雖然佢張合約到2025年先完結，但就算佢喺德甲打返起，曼聯都未必可以收得番，因為法蘭克福季尾有權用1,210萬鎊將呢位荷蘭中場買斷，遠低於曼聯喺2020年買入價嘅4,000萬鎊。法蘭克福目前排德甲第6位，而且仍然喺歐協聯角逐。