東網電視
更多新聞短片
杜韋麥尼爾照顧女友無微不至。
英超球員嘅桃色新聞就聽得多，但原來都有深情「暖男」，愛華頓翼鋒杜韋麥尼爾喺聖誕新年快車場場踢足，估唔到比賽以外，佢一直醫院、球場兩邊走。杜韋麥尼爾女友Megan Sharpley最近發表感人公開信，多謝杜韋麥尼爾不離不棄嘅照顧，令人為之感動。
杜韋麥尼爾喺12月份8場波場場正選，其中7場踢足全場，但喺呢個佳節期間，佢女朋友Megan就做咗一個緊急手術，甚至有器官被切除，手術後亦要繼續住院。Megan最近喺社交網感動表示：「杜韋，每次收到噩耗，你都會捉住我雙手，你提醒我自己有幾堅強，話畀我知一切都會冇事。你幫我着衫、幫我清潔、餵我食飯、幫我打針，全心全意咁照顧我，而且永遠唔會投訴，你瞓喺我病床隔離，就算我覺得世界末日，你都喺度逗我開心，你係世界上最神奇嘅人！」
24歲嘅杜韋麥尼爾亦轉載女友嘅貼文，留言回應：「我哋係一隊人，我愛您！」呢位英格蘭翼鋒2022年由般尼加盟愛華頓，上季為球隊交出7個入波同3次助攻，今季已有2個入波同4次助攻，成為愛華頓不可或缺主力。
