東網電視
更多新聞短片
布查上場打破入球荒。(Getty Images)
車路士今季傷兵滿營，法國前鋒尼干古上月重傷初愈，踢咗3場比賽後又再受傷，領隊普捷天奴透露佢可能「缺陣數場」，消息指呢位法國前鋒將缺陣3個星期。由於尼高拉斯積遜要踢非國盃，令原本被掛牌嘅布查成為依家唯一箭頭，車路士或焗住留用佢到季尾。
尼干古缺席上場英足盃後，普捷天奴證實佢臀部受傷，未來幾場未必可以候命，慶幸嘅係阿爾巴尼亞前鋒布查喺對普雷斯頓打破入球荒，車仔未來一段日子都要靠佢頂住。普捷天奴表示：「布查係時候交貨，佢需要更多笑容，樂觀態度對佢會有好處。布查嘅潛力極大，講緊係英超以至歐洲最有潛力嘅年輕前鋒，上場入波對佢嘅信心會有好大作用。」
據報車路士本來打算1月賣人套現，布查、干拿加歷查、杜利奧查洛巴等青訓球員都係清洗目標，不過隨住尼干古同尼高拉斯積遜齊齊缺陣，現年22歲嘅布查有望繼續留隊，或可以用表現去令普捷天奴回心轉意。
