東網電視
更多新聞短片
阿仙奴正在杜拜集訓。
近期成績陷入低谷嘅阿仙奴，趁空檔期拉隊飛去杜拜進行集訓，球會周五(12日)公開嘅訓練情況，多位傷兵都可以重投操練，包括已經養傷5個月嘅荷蘭國腳祖利安添巴，另一長期傷兵湯馬士柏迪據報亦會喺今個月內復出，幫助阿仙奴爭取谷底反彈。
阿仙奴今次杜拜行暫未安排熱身賽，純粹畀球員喺陽光下練習兼散心，一眾傷兵亦有隨隊出發，喺今季開咧戰即重傷嘅祖利安添巴，首度重返訓練場練習，相信離復出之期不遠。至於因大腿受傷缺陣3個月嘅湯馬士柏迪，亦重返練習場做輕度訓練，英國《每日鏡報》指呢位加納中場有望喺今個月底作客諾定咸森林一戰復出。
最近因傷缺陣嘅左閘辛真高同前鋒加比爾捷西斯，同樣已經投入操練，目前「兵工廠」仍有中場法比奧韋拉養傷，而後衞富安健洋正代表日本備戰亞洲盃。阿仙奴下場比賽，將會係20號主場迎戰水晶宮。
