【官宣】比列錫重返母會夏德　球員生涯最後一站

克羅地亞球會夏德正式宣布，向熱刺借用翼鋒比列錫，直至今季結束，由於呢位即將35歲嘅好老將只剩下半年合約，借用期屆滿之後，就會以自由身正式離開熱刺，並繼續為夏德效力，好大機會留喺母會掛靴。

比列錫出身於夏德青年軍，但並未曾為一隊上陣就離隊，先後效力過布魯日、多蒙特、禾夫斯堡、國際米蘭等球隊，2022年夏天加盟熱刺，上季上陣44場入1球，但上年9月受重傷後，一直缺陣，呢位克羅地亞國腳可能要等到4月先至可以復出，所以熱刺唔介意免費放走佢，比列錫加盟夏德後，獲得佢最喜歡嘅4號球衣，只收取象徵性1歐元(約8.53港元)人工。

夏德月初已經簽入另1位克羅地亞36歲老將射手卡連歷，球隊現時排聯賽榜首，卡連歷同比列錫好大機會一齊為母會捧盃。