迪羅斯執教羅馬旗開得勝　前隊友成大功臣

羅馬早前炒咗名帥摩連奴，並聘請名宿迪羅斯回巢執教，發揮「新帥效應」，呢位40歲少帥喺周日(21日)凌晨意甲，首次領軍出擊，主場以2比1擊敗維羅納，旗開得勝。迪羅斯昔日嘅羅馬及意大利國家隊隊友艾沙拉維貢獻2次助攻，成為贏波功臣，呢對拍檔產生化學作用。

摩連奴以往慣用352陣式，迪羅斯作出改變，今仗排出4321「聖誕樹陣式」，效果相當不俗，開賽19分鐘，艾沙拉維個人表演扭入禁區，橫傳畀盧卡古射入。僅過6分鐘，艾沙拉維二傳畀羅倫素柏歷堅尼射成2比0，即使維羅納下半場追番1球，都冇阻羅馬全取3分，結束連續3場不勝頹勢。

艾沙拉維今仗表現備受讚賞，好大程度上因為迪羅斯安排佢出任最擅長嘅第2前鋒位置，有別以往「寸王」執教時期，要佢踢左中場，甚至左翼衞，迪羅斯成為羅馬主帥，艾沙拉維無疑係最大受益者。